Қазақстан ғылымды коммерцияландыру ісін үдетіп, ғылыми жобаларды қаржыландырудың басымдықтарын өзгертуі керек. Бұл туралы бүгін елордадағы Тәуелсіздік сарайында өтіп жатқан «Қазақстанды жаңа индустрияландыру. 2015 жыл қорытындысы» атты жалпыұлттық телекөпірді қорытындылаған Елбасы Нұрсұлтан Назарбаев айтты.
«Индустрияландырудың инновациялық құрамын - отандық ғылымды дамыту бағытын индустрияны күшейтуге жұмсау керек. Ғылыми зерттеулерді қаржыландырудың әдіс-тәсілдері мен басымдықтарын өзгертуіміз керек», -деді Мемлекет басшысы.

Президент атап өткендей, Қазақстан ғылыми жобаларды коммерцияландыру бағытында көштен қалып келеді.

«Ғылыми жобаларды коммерцияландыруды үдету керек, себебі, осы сала бізде ақсап келеді. Үкімет пен жоғарғы оқу орындары, бизнес компаниялары осыған назар аударуы керек. Өнімділік пен сапаны ғылымсыз дамытуға болмайды. Яғни, бұл ғылымды дамытпасақ, экспортқа да шыға алмаймыз деген сөз», - деді Н.Назарбаев.

Автор: Кенжекей Тоқтамұратқызы

Дереккөзі: inform.kz