Астанада екі күннен бері Х Азия нейрохирургтерінің конгресі өтіп жатыр. Конгреске жиналған жұрт нейрохирургия мен неврология саласындағы заманауи технологиялар мен тәжірибе алмасу жайын талқылауда.
Орталық Азия мен ТМД кеңістігінде алғаш рет өтіп жатқан осынау шараға 50 шақты елден 700-ден астам делегат қатысуда. 13 қыркүйекке дейін жалғасатын жиында 240-тай баяндама оқылады деп жоспарланыпты. Осының өзі конгресс салмағын сездіріп тұрғандай.
Конгресс қарсаңында Ас­та­надағы «Ұлттық нейро­хирур­гия орталығында» Жа­по­ния, АҚШ, Түркия, Гер­ма­ния, Ресей, Израиль және Қа­зақстанның үздік ней­ро­хи­рург­тері шеберлік сабағы ре­тінде 7 отаның үлгісі көрсе­тіл­ді. Ал кеше «Риксос» қонақ- үйін­де конгресс шеңберінде ІІІ нейрохирургиялық мед­би­келер конгресі, сондай-ақ Азия­ның әйел ней­ро­хирург­тері қауымдастығының кез­десуі ұйымдастырылды. Ал Ней­рохирургтардың Х азия­лық конгресінің ашылу рәсімі алдыңғы күні түс ауа Астана операда өтті.
«Менің ойымша, осындай дә­рігерлердің басын қосу – Қа­зақстанның жас нейро­хирур­гиясы үшін үлкен жетіс­тік. Бұл жиын Қазақстандағы нейрохирургияның дамуына септігін тигізеді деп ойлай­мын. Себебі, конгреске дүние жүзіне аты әйгілі дәрігерлер қатысып жатыр. Конгрестің қорытындысы ретінде қазіргі нейрохирургия саласындағы ең өзекті мәселелерді, ең үл­кен жетістіктерді талқы­лай­мыз. Сол жаңалықтарды өз тә­жірибемізге енгіземіз деген ой бар. Қазақстанда жаңа технологиялар бар, солардың арқасында Қазақстандағы науқастарды емдеуге әлеуеті­міз толық жетеді» деді БАҚ өкіл­деріне сұхбат берген Серік Ақшолақов.
Халықаралық нейроғы­лым институтының құрметті президенті Маджид Самиидің айтуынша, Астанадағы ней­ро­хирургия орталығы қысқа мерзім ішінде жоғары деңгей­ге қол жеткізді. Мұндай пікір­ді кеше Орталық коммуни­кация­лар қызметінде өткен ар­найы брифингте Нейро­хирург­тердің Азия конгресінің президенті Йоко Като, Дүние­жүзілік нейрохирургтер қоға­мы федерациясының прези­ден­ті Питер Блэк, Дүние­жүзі­лік нейрохирургтер қоғамы фе­дерациясының құрметті президенті Александр Коно­ва­лов, Дүниежүзілік нейро­хирург­тер қоғамы федерация­сының вице-президенті Алек­сандр Потаповтар да мәлім­деді.
Мысалы, А.Коновалов әдет­те Азия нейрохирургтері­нің конгресі нейрохирургия саласында халықаралық дең­гей­ге көтерілген елдерде ғана өте­тінін тілге тиек етсе, А.По­­­тапов заманауи нейро­хирур­гияның дамуы соңғы үлгідегі медициналық құрал-жабдықтармен байланысты екенін еске салды. Мысалы, мидың жұмысын зерттеп бе­ретін томографиялық қон­дыр­ғылар ота алдында нейро­хирург үшін сенімді көмекші міндетін атқара алады. Осы тұр­ғыдан алғанда, Астанадағы нейрохирургиялық орталық­тың бағы бес елі.
Бүгіндері Қазақстан ней­ро­хирургиясы десе, бірінші кезекте Серік Ақшолақов еске түседі. Серік Қуандықұлы не­гізгі қызметімен қоса Қазақ­стан нейрохирургтері қауым­дастығына да жетекшілік етеді. Бұл күндері Қазақстан нейрохирургтер қауымдасты­ғы дүниежүзілік, еуропалық нейрохирургтердің, Азия ней­рохирургтері қауымдасты­ғы­ның мүшесі. Осы мүшеліктің арқасында отандық дәрі­гер­леріміз шетелдік әріптес­тері­мен тығыз байланыста, сала­да­ғы соңғы жаңалықтардан же­дел хабар алады. Бұл да өз ке­зегінде медициналық ту­ризм­ді дамытуға септігін ти­гізу­де. Мысалы, осы уақытқа де­йін орталыққа шетелден ем­делу үшін келетіндер кө­бей­ді. Олардың арасында Гер­ма­ния, Канада, Ресей, Түр­кия, Ұлыбритания, Франция, Нигерия, Өзбекстан, Қыр­ғыз­стан және Тәжікстан аза­мат­тары.
Осыдан екі жыл бұрын Қа­зақстан нейрохиругтері Ор­та­лық Азия елдері арасында ал­ғаш болып Дүниежүзі ней­ро­хирургтерінің білім же­тіл­діру курсынан өтті. Дүниежүзі нейрохирургтері қауымдасты­ғы­ның президенті Питер Блэк бас­таған әлемнің мықты ма­ман­дары қазақстандық дәрі­гер­лер жасаған оталарды кө­ріп, Астанадағы орталықты дү­ниежүзі нейрохирургтерін дайындап шығаратын алаң ретінде пайдалануға болады деген баға берген. Міне, сол Питер Блэк мырза кешелі бері өтіп жатқан конгрестің бел ор­тасында жүр. Орталық бо­лашақта АҚШ-тың Пенсиль­ва­ния штатында орналасқан, екі ғасырдан астам тарихы бар Питтсбург университетімен серіктес болмақ. Ол үшін ней­рохирургтер ағылшын тілін еркін меңгеруі керек. Сон­дық­тан орталықта ағылшын ті­лін оқытатын курс ашылған.
Бүгінде орталық салада кен­же қалған функционалды ней­рохирургияны дамытуды қол­ға алып отыр. Бұл ми ішін­дегі өте тереңде жататын түрлі өзгерістерді анықтауға мүм­кіндік беретін – нейро­нави­гациялық жүйесі. Компью­тер­лік томография, МРТ құ­ра­лы­мен тікелей байланысты ней­ро­навигация аппараты терең­де орналасқан ісікті дәл тауып бе­реді.
Айта кетейік, Азия нейро­хирургтері конгресі 1993 жы­лы алғаш рет Жапонияда өткі­зілген екен. Осыдан кейін екі жыл сайын әлемнің ірі қала­лары мен ел астаналарында тұрақты түрде өтіп келеді.
2008 жылы Куала-Лумпур қала­сындағы кезекті жиында Қа­зақстан мерейтойлық конг­рестің өткізілетін орны болып таң­далды.
Авторы Халима БҰҚАРҚЫЗЫ

Дереккөзі: http://www.aikyn.kz