Марғұлан университетінің археолог студенттері Павлодар облысының Баянауыл ауданынан сақ көшпелілеріне тиесілі сирек кездесетін екі қола пышақ тапты. Құнды жәдігерлер Торайғыр көлінің маңындағы сақ қорғанында жазғы далалық тәжірибе кезінде анықталды.
«Биыл біз Торайғыр-6 атты белгілі ескерткіште жұмыс істеп, тас төбенің шыңын зерттедік. Сол жерде жаңа қорғандар тобы — Торайғыр-7 анықталды. Екі қорғанды қазу барысында біз қола пышақтарды таптық, олар сақ дәуірінің ерте кезеңіне жатады», — деді Марғұлан университетінің археологиялық қорларының бас сақтаушысы Елена Тушева.
Зерттеушілердің айтуынша, бұл Павлодар облысында табылған ең көне қола бұйымдардың бірі. Пышақтар жергілікті қоладан ежелгі технологиямен құйылған, бірақ стилистикалық жағынан ерте темір дәуіріне жатады.
Марғұлан университеті Баянауыл аймағында 10 жылдан астам уақыт бойы зерттеулер жүргізіп келеді. Оқу ордасы Ә. Марғұлан, М. Қадырбаев, А. Акишев сынды ғалымдардың «мұртты обаларды» ашқан жолын жалғастырып жатыр.
Дереккөз: https://ppu.edu.kz/mu-arxeologtari-qola-pisaqtarin-tapti
Фото:Ppu.edu.kz
.jpg)
