EXPO-2017

Қазақстандық инженерлер Еуроодақ елдерінде еркін жұмысқа орналасу мүмкіндігіне ие болды

20.10.2015

7495

Қазақстанның инженерлік білім беру қоғамы (KazSEE) Еуропа ұлттық инженерлік қоғамдары федерациясы (FEANI) Бас Ассамблеясының Лиссабон қаласында өткен кезекті отырысында осы ұйымға толық мүше болып қабылданды. Бұл туралы әл-Фараби атындағы Қазақ ұлттық университетінің баспасөз қызметінен хабарлады.
«Қазақстанның инженерлік білім беру қоғамының «FEANI»-ге толық құқылы мүше болуы жаратылыстану, инжиниринг және технология саласындағы мамандарға біліктілігін арттыруға, инженерлік карта (Engineering Card) мен еуропалық сертификат алуға және ең бастысы - еуропалық инженерлер тізіліміне (EurEng) қосылуға жол ашады. Ал бұл, отандық инженерлерге алдағы уақытта Еуропалық Одаққа мүше елдерде еркін жұмысқа орналасуға мүмкіндік береді», - деді осыған орай Қазақстанның инженерлік білім беру қоғамының президенті, әл-Фараби атындағы ҚазҰУ ректоры, академик Ғалым Мұтанов.

Айта кетелік, Қазақстанның инженерлік білім беру қоғамы (KazSEE) 2007 жылы құрылған болатын. Оның Еуропа ұлттық инженерлік қоғамдары федерациясына толық мүше болып қабылдануы сонымен қатар, халықаралық сертификаттарға ие инженерлік білім беруде және заманауи техникалық мамандар дайындауда, Елбасының «Қазақстан-2050» Стратегиясын жүзеге асыруда оң нәтиже беретіндігі сөзсіз.

1951 жылы құрылған «FEANI» қазіргі таңда Еуропадағы беделді кәсіби бірлестіктердің бірі болып саналады. «FEANI» - Дүниежүзілік Инженерлік Ұйымдар Федерациясының (WFEO) негізін қалаушы ұйым.

Оның ЮНЕСКО-ға, БҰҰ жанынан құрылған өндірісті дамыту жөніндегі ұйымға және Еуропа Кеңесіне ақыл-кеңес беруші мәртебеге ие.

Кәсіби бірлестікке әр елден бір ғана ұйым мүше бола алады. Ол сол елдің барлық инженерлік бірлестіктерінің мүддесіне жұмыс жасауы шарт.

«FEANI» бүгінде 350-ге жуық ғылыми және инженерлік ұйымдарды және Еуропаның 32 елінен 4 млн. кәсіби инженерді біріктіреді.

Дереккөзі: inform.kz

«« | »»
Соңғы жаңалықтар