Қазақстанның жоғары оқу орындарына келер оқу жылына 39 994 грант бөлінді. Бұл туралы Астанада өткен селекторлық алқа мәжілісінде білім және ғылым вице-министрі Такир Балықбаев мәлім етті.
«Келер оқу жылына мемлекеттік тапсырысты бекіту туралы қаулы қабылданды. Мемлекеттік тапсырыс көлемі 39 994 орынды құрайды, соның ішінде бакалавриат - 32 168 грант, магистратура -7 241 грант, докторантура - 623 грант. Өткен жылдардағыдай биыл да мемлекеттік тапсырыстың басым бөлігі техникалық мамандықтарға беріледі - 42,4 %», - деді вице-министр.

Т.Балықбаевтың атап өтуінше, биылғы жылдың ерекшелігі - қазақ бөлімінде оқитын түлектерге гранттардың 75%-ы, ал орыс тілді түлектерге 25%-ы беріледі. «Бұндай шешім қазақ бөліміндегі конкурсқа қатысушылардың саны мен жинаған балдар деңгейін ескере отырып қабылданған», - деп мәлім етті ол.

Дереккөзі: inform.kz