Препараттың негізгі мақсаты – қатерлі ісік жасушаларының өсуі мен өмір сүруіне қатысатын бірнеше биологиялық үдерісті бір уақытта реттейтін TopBP1 ақуызының BRCT7/8 бөлігін бұғаттау. Ғалымдар оны қатерлі ісіктің «биологиялық басқару тақтасы» ретінде сипаттайды.

Зерттеу барысында мыңдаған химиялық қосылыс тексеріліп, олардың ішінен CS18 әзірленді. Зертханалық тәжірибелерде препарат MYC және мутантты p53 сияқты қатерлі ісіктің дамуына ықпал ететін факторлардың белсенділігін төмендетіп, ДНҚ-ны қалпына келтіру үдерістерін әлсіреткен. Соның нәтижесінде қатерлі ісік жасушаларының өлу ықтималдығы артқан.

CS18 үштік-теріс сүт безі қатерлі ісігі, аналық без, өкпе аденокарциномасы, өкпенің жалпақ жасушалы қатерлі ісігі және жедел миелоидты лейкоз жасушаларында сыналды. Сонымен қатар препараттың қатерлі емес жасушаларға уыттылығы төмен болған.

Ғалымдар CS18-ті қолданыстағы препараттармен біріктіргенде нәтижелер күшейгенін анықтады. Мысалы, оны осимертинибпен бірге қолдану осимертинибке төзімді өкпе қатерлі ісігі жасушаларының қайтадан емге сезімтал болуына ықпал еткен. Жануарларға жүргізілген тәжірибелерде мұндай комбинация ісік өсуін айтарлықтай тежеген және елеулі уыттылық белгілері байқалмаған.

Зерттеушілер CS18-ті әрі қарай зерттеп, оны қатерлі ісіктің емге төзімділігін жеңуге бағытталған біріктірілген терапияның бір бөлігі ретінде дамытуға болады деп санайды.